ОХРИДЫН МАНДАЛ ДЭЭР

Цаашлан алсрах завины бараа

Цөлийн дундуур

Цахилан хулжих гөрөөс мэт, урамтай, гунигтай.

Хэн нэгнээс орхигдон хоцроод эргэн тойрноо харахад

Хэсэгхэн салхины чимээ л

хань болох гэж ядмагхан оролдон

хацар нүүрийг дүйгүйхэн тэмтэчдэг шиг,

Тийм нэгэн, сэтгэлд үлдэцгүй чийгтэй хөнгөн агаар

Тэнгэр өөд дэгдэх замдаа зүрх үймүүлнэ.

Дэгдээд л замхрах ийм хөнгөн уйтгар заримдаа.

Дэндүү... Бушуухан үхэх хүслийг өдөөдөг.

Яг одоо би тийм л хүслийнхээ ховсноос ангижрах гэж

Яралзан одох завины барааг тасартал ширтэж сууна.

Г.Аюурзана. "Сэтгэл рүү шагайгч түүнд" номоос.